【九洲芳文】如风往事之－－再讲关于剃头发迭桩事体【沪语方言文章】
勒迭个前头，吾已写过两篇叫做《如风往事之－－漫谈关于剃头发这件事情》搭《如风往事之－－讲讲关于剃头发迭桩事体》个文章，总觉着有些意犹未尽缺少一眼么事，还有话呒没去讲完，还是有些话语可以拿出唻讲讲个，因此，就决定再撰写一篇剃头发个文章。
我是土生土长个上海人，勒国语当中搭“理发”有关系个词眼，勒吾所在个城市上海、勒沪语方言俚语闲话中，会演变成为三组词眼，伊拉分别是指：“剃头发”“剪头发”搭“汏头（发）”。其中“汏头（发）”就是指“洗头发”。勒一般情况下唻讲，唯有那些女性个同胞侪会去使用迭个词眼，而且频率是唻得邪气高个。比方讲：两位熟识个女性相互间勒马路浪碰着，互致问候嘎讪胡，其中一位会讲：“今早仔吾去剃头店汏汏头。”意思就是讲去理发店美容美发。
吾出生于20世纪70年代个末期，拨大家称之为“70”后，正因为是迭能，自家对于剃头发迭桩事体，记忆顶清爽个就是－－凡是从吾伲那个年代过唻个人，而且年龄搭吾相仿、相差无几个一代人，也是有经历过计划经济迭个年代个，吾所经历过个计划经济年代，时长顶少也要拥有十五六年个辰光。那个年代个男小囡，发型几乎是一色似样个，清一色个板寸头，剃头发至耳根以上，整齐干净即可。
回过头想想，吾还发现迭能个一个问题，勒计划经济个年代里向，但凡是搭吾个年纪差覅多个人，基本浪向侪是以板寸头头型为主个，绝对覅会去剃其他类型个发型。为啥事体要去剃迭能一个发型呢？！侪是爷娘个要求呗！只因为勒吾伲那个年代还处勒计划经济时期，覅仅爷娘个收入是有限个，而且每家每户个收入侪是相差无几个，更何况上海人侪会得精打细算个去过日脚。一样去剃头店剃头发，每趟去剃一个板寸头个闲话，多多少少能减少去剃头店个趟数，能拨屋里省一眼铜钿，以便能拨省下唻个铜钿用勒其他需要用铜钿个地方。
常桩听到老辈人讲迭能个一句话，曰：“有力长发！”意思是讲：凡力气大个人，头发长得邪气快。虽然吾从小到大力气并覅大，但头发也是长得邪气快！剃头发基本浪向保持顶少勒三个礼拜一趟。
为啥事体吾顶少也要等到过忒三个礼拜以后，就要去剃头店剃头发呢？！除忒因为自家个头发长得邪气快个缘故以外，还因为自家个头发又是属于那种长得交关个硬哦，拨剃头师傅们感觉就是属于硬邦邦类型个，一旦吾个头发长得交关长以后，就好像是公鸡个鸡冠一样，而且根根头发侪会得翘起唻个，即便勒后唻发明有美发用个摩丝，还即便是吾使用过摩丝以后，勒当天是没事个，等到第尼天依然如故、头发依旧是要翘起唻个，所以侪要勒迭个辰光段里向去剃头发。
勒掰时，吾就发现迭能个一个现象，覅晓得到底是啥个原因，处勒吾伲那个年代里向个男小囡侪是犯有一个通病，大家也侪是覅大欢喜剃头发迭桩事体个，也侪是交关讨厌剃头发个。每当等到要剃头发个辰光，还只要是听到爷娘讲：“去剃头店剃头发。”吾伲覅是逃之夭夭，就是又哭又闹耍无赖，能躲则躲，反正是无所覅用其极。
吾还常桩听到有人讲过迭能个一句闲话，曰：“只有那些女性同胞们侪会去采用‘一哭’‘二闹’‘三上吊’个种种覅好手段！”……吾伲勒掰搿辰光，竟然也会去采用迭能个一种手段哦！勒多数辰光还要上演全武行，就是想方设法个去逃避剃头发迭桩事体，其实迭种做法并呒没多大个用处，熬到最后一刻，还是要乖乖个去剃头发个。没用归没用，每趟剃头发前头吾伲照样欢喜迭能闹腾。
覅仅是迭能样子唻，只要是每趟勒剃头发前头，吾伲依旧还会故伎重演个，而且还要一趟又一趟、反反复复个，好像迭一类个闹腾，已然成为一种家常便饭似个，基本浪向侪是经历过迭种状况个。
至今为止，吾依旧还能够清爽个去记得迭能个一桩事体，迭桩事体就是－－勒吾读小学二三年级辰光，有一趟家母倪榴珍烦请药店里个同事张金荣（勇）利用上班时个空余辰光帮吾剃头发，【备注：向家母问询迭位男同事个姓名，因为辰光久远个原因，家母已记覅清爽最后一个字是叫“荣”还是“勇”。】因为吾也是覅肯剃头发个，也交关讨厌剃头发个缘故，就搭家母以及伊个男同事大吵大闹过一架……正所谓有句老话讲得邪气好，曰：“无巧不成书！”恰巧那一天有上级领导唻检查工作，发现此事后，扣除家母搭男同事当月个奖金。
还要想讲个闲话就是，勒掰搿辰光，还为啥事体要叫家母个男同事张金荣（勇）帮忙剃一趟头发呢？！主要是有如下个两个原因造成个。第一个原因就是：迭能唻做能为屋里向省一眼铜钿；第二个原因就是：张金荣（勇）覅单单祖籍是苏北人，而且伊拉个祖上一直侪是干剃头发迭个营生个，传到伊个手里起码已经是第四代人，伊是会剃头发迭门手艺个，讲一句真心话，而且迭门手艺也是邪气覅错。
伊曾经搭吾勒一道“谈山海经”“嘎讪胡”个辰光，告诉过吾，之所以伊会唻药店做生活，自家就覅想走父辈们个老路。【备注：“谈山海经”搭“嘎讪胡”侪是沪语方言俚语，意思指个就是聊天。】
迭还覅算啥么事，吾也是演绎过全武行迭桩事体个，曾经自家还去上演过“消地光”个举动唻哦。“消地光”迭个词眼是上海崇明地区、江苏启东地区、江苏苏北等各个地区个方言俚语词眼，伊个意思通常就是指有人长辰光个躺勒地浪耍赖、覅停个打滚覅肯起唻。
回过头再唻看看迭桩事体，觉得小辰光个吾真个是一眼眼也覅懂事体，就覅应该迭能唻瞎闹腾个，害得家母以及伊个同事受罚。迭真个是覅吃一堑，难长一智！只有经历过啥个是错与对，侪能使自家尽快个成长起唻。经过迭趟教训之后，类似个错误就呒没再犯过。
仍然让吾记忆犹新个一桩事体，那就是－－当吾也长大懂事以后，尤其是勒吾刚刚侪开始工作个辰光，每趟去剃头店剃头发个辰光，剃头老师傅所使用个工具是手动个剃头推子，勒拨每一位顾客剃头发前头，伊拉还会得拨手动个剃头推子上一眼眼油，再去反反复复个一捏一放夹勒手里向个手动剃头推子，还要让伊发出嘎哒嘎哒、油润般个声响，迭能唻做个目的就是要去试试剃头推子到底好覅好使用，也唯有当剃头师傅觉着好去使用时，侪会安心个拨顾客去剃头发个。
吾勒使用手动剃头推子剃头发个那些日脚里向，勒一年16趟左右个剃头发当中，一半辰光去剃头店剃头发个，另一半辰光是由家里会剃头发个亲朋、爷娘个好友同事及隔壁邻居帮忙个。除忒上头所讲个、家母个同事张金荣（勇）以外，还有三姨妈倪金英、三表姐夫张征西、曾经个“老邻居徐成刚”大哥，或多或少侪有拨吾剃过头发个。
【备注：“老邻居徐成刚”个名字，既是家母告诉吾个，也是音译而已，尽管讲吾家搭伊拉是十几年将近二十年个邻居，彼此之间个关系还是交关覅错，吾从唻呒没询问过伊个具体名字是姓啥，哪能去书写个，吾有时，覅是叫伊“成刚叔”，就是叫伊“成刚哥”。】
吾有认认真真个去思考并考虑过关于“剃头发”迭桩事体个，勒吾伲那个年代个小囡，还只要是搭吾个年龄是相差无几不相上下个男小囡们搭女小囡们，覅愿意去剃头店剃头发，有如下三个原因造成个，而且男小囡搭女小囡做对比与比较，男小囡就要唻得更多一些。
第一个原因就是：再哪能好个一把手动个剃头推子，辰光一长久而久之长此以往下去个闲话，也会出现问题个，迭个问题就是－－要是长久性个去使用，就会得发生夹头发个覅好现象，而且像迭种夹头发个覅好现象，勒剃头发个全过程当中，覅只是有一两趟之多哦，而是频繁个会去发生夹头发个迭种覅好现象，迭也很可能是导致勒吾伲那个年代里个男小囡，侪是覅愿意去剃头店剃头发个原因之一。
第二个原因就是：一旦会频繁个发生夹头发迭种覅好个现象以后，绝对会疼得邪气结棍，因为疼痛个交关厉害个缘故，同样是辰光一长久而久之，有过一两趟以后，对于像迭种疼痛之感，覅但会去产生一种莫名个恐惧之感，还会去形成一种恶性循环，从而就会导致，覅管是勒剃头发前头，还是勒剃头发个全过程当中，总归是要去闹腾一番个，从开场个那一刻起，一直要等到快结束时，侪会停止闹腾。
第三个原因就是：还有一种情况，也同样导致男小囡覅愿去剃头店剃头发。勒剃头发前头、勒剃头发个全过程当中，就是要去闹腾一番。侪是因为勒男小囡们看起唻，剃头发个辰光，覅管是属于“漫长个”，还是属于“短暂个”，就是属于“邪气漫长”个，有“度秒如年”个感觉，还若是碰着难剃个头型，或剃头师傅个水平覅唻三，辰光会拨拉得更加长，迭种感觉也会随之变得越唻越强烈，又好似自家勒受到刑罚搭惩罚一样，还加之，勒剃头发个全过程当中，时覅时个会有短头发触及身体浪个各个部位，会让人感到浑身上下侪是痒痒个，一点也覅是邪气自在个。吾询问过同龄人，搭吾有相同个感受。
等到自家再大一眼个辰光，去剃头店剃头发个辰光，已经逐渐个开始推广使用电动个剃头推子，勒掰时电动个剃头推子侪是佩戴有一条长长个电线个，可以搭手动个剃头推子一道混合着去使用个。
自从发明电动个剃头推子，自然要比手动个剃头推子，唻得便当省力。畀过，对于手艺交关好个老师傅唻讲，依旧会坚持使用手动个剃头推子。吾也曾向迭些老师傅问过为啥就要迭能唻做？！伊拉侪是异口同声地唻讲道：“用手动个剃头推子，侪能显示出自家个手艺搭水平，只因手动推子个难度要比电动个推子高出邪气多！”……
还有个就是，当手动个剃头推子搭电动个剃头推子混合勒一道去使用个日脚里向，男性或男小囡去剃板寸头时，一定要去汏一下头个，等到汏好头以后，剃头老师傅还要去整理修整一下，看看头浪是否依旧会有高低覅平整个地方，最后再做一趟修整，有一些老师傅侪会去使用电动个剃头推子修整，好让男性顾客个头发变得整齐划一。
到后末唻，全面去普及推广使用电动个剃头推子以后，手动个剃头推子，几乎可以讲是绝迹。去使用电动个剃头推子，一直侪会有呜呜个声响，而且伴随着迭种声响，随时随地会发生夹头发个现象搭恐惧之感，也会紧跟着一道消失忒，迭倒并覅是讲，电动个剃头推子覅会去发生夹头发个覅好现象，偶尔也有个，几乎是忽略覅计个。
也正是因为电动个剃头推子有呜呜个声响个缘故，就好似勒演奏一首悦耳动听个催眠乐曲一样，有些辰光还会让人昏昏欲睡个。
今早仔，去剃一个板寸头已变得越唻越流行，人们拨“板寸头”又叫做“老板头”。只因当代个国人，交关流行拨各行各业个一把手或某个部门个一把手侪统称为“老板”，而且伊拉又喜欢迭能个头型，老板剃一个板寸头，板寸头自然而然个拨称之为“老板头”喽！
对于“板寸头”，让自家顶记忆犹新个一桩事体就是，当本人1999年至2003年就读大学专科函授班个辰光，班级里向有位同学业余爱好只爱好打乒乓球，还欢喜剃一个板寸头，就请理发造型师拨设计成为乒乓球桌型个板寸头，等头发剃好以后，引唻一路人个围观……
【备注：①：文章为作者原创；②：各种老上海理发店搭理发工具侪是唻源于网络上头；③：万分感谢原创图片。】
杜老倌侠客居（陆伟）写于2009年10月30日礼拜五夜里向
