又到暑假嘞。而家啲学生哥放假唔系去旅游，就系去夏令营，或者去少年宫学嘢，总之就四处奔波，节目多多。同我哋细个嗰阵相比，直情系蚊同牛比——冇得比。不过，我谂起有一个乐园，我哋细个放暑假嗰阵成日都想去，今时今日已经消失咗，所以而家啲细路都唔知道有呢个去处。呢个咁值得回味嘅乐园，就系街边嘅公仔书铺嘞。
上世纪六十年代初，广州嘅大街小巷有好多提供租睇公仔书（连环画） 嘅铺头，呢啲“公仔书铺”其实豆腐润咁细嘅地方，摆放几张长条矮凳仔，周围挂满公仔书封面嘅裱纸，虽然又嘈又迫，却系当时细路好中意嘅地方，求家长摞到一、两分钱跑去公仔书铺嘅心情，肯定开心过而家啲细路揸住十几蚊去打机。你睇啱边本，话畀书铺嘅老伯听，佢就会揾出嚟，畀你座喺矮凳仔睇 。50页以下，半分钱一本（畀一分钱找番一张盖住公仔书铺名字印章嘅纸片）；99页以下，一分钱睇一本；100页以上，2分钱睇一本。（租返屋企睇，每日租金双计。新书唔畀租返屋企睇）。而且一般不限时。每到放寒暑假，直情座无虚席爆嗮棚。一啲热门书如《三国演义》.《杨家将》往往早就畀人捷足先登租咗睇紧，想睇就要老伯报名登记等候。而喺等候期间，有时可以“搭睇”——就系坐喺睇紧书嘅细路旁边斜住睇。
有旧同学讲起当年公仔书铺事，佢话佢哋街口嗰间系唔畀搭睇嘅，人手一本，各睇各书，无书者就是冇畀钱偷走入嚟嘅，一经发现，马上驱逐。我话冇错，我哋巷尾嗰间原先可以，后来因为鬼马仔钻空子，少赚了钱，后来都唔畀嘞。其改变过程，本人重有幸经历。
小学四年级暑假嘅一个下昼，我正喺榕树荫下闲坐，同学奀仔、细强走过嚟，问我去不去租书睇，我话我今日冇钱。佢哋自豪咁话我哋有！原来奀仔帮屋企担水（从街头公共自来水站），细强帮阿嫲掹白头发，都摞到一分钱奖励。佢哋话以前你关照我哋，今次请你去搭睇。我喜出望外跟佢哋去租书铺。奀仔租咗本《赵子龙血战长坂坡》，，细强递畀我一分钱，叫我故意又租同一本。书铺老伯戴住个老花眼镜，慢吞吞揾嚟揾去揾唔到，话畀人租咗，归还先有，你坐低等下啦。我就偷偷将钱还畀细强，然后坐喺奀仔旁边搭睇。细强用一分钱租咗《空城计》，亦坐喺我身旁。我以飞快嘅速度左睇右看。奀仔同细强睇完书后又神不知鬼不觉咁互相调换。两个钟后，我哋心满意足离座。两分钱换嚟三个人睇咗两本厚书，我重睇多一次（不过左拧右扭颈有啲酸），奀仔同细强重储备咗一份我嘅搭睇人情。我自然多谢夹盛惠。我哋重谂住，下次有机会再嚟个照版煮碗。点知，第二日书铺老伯就出咗张告示唔畀搭睇嘞，告示内容至今重清楚记得：搭睇可怜，换书可耻，一律禁止，违者罚纸（半分钱）！
如今已无影无踪嘅公仔书铺，当年畀咗我哋无限嘅快乐。本来好有人情味嘅书铺老伯，我哋啲顽童却揾人笨带畀佢麻烦，而家谂番转头，重有几分内疚。
