མ་བཟང་བུ་མོ།
༡
ཁྱེད་རང་གྲང་རག་གི་འཇིག་རྟེན་ན།
སྨྲ་བ་མེད་པའི་རྡོ་སྐུ་བཞིན།
འགྲེང་ངེར་འགྱངས་ཏེ།
ང་ལ་གསོན་ཤུགས་ཀྱི་དྲོད་ཁོལ་སྟེར་བའི་གཟིམས་མེད་ཀྱི་མེ་ལྕེ་ཞིག
ང་རང་སྐྱེ་སྟོབས་ཀྱི་གསོན་ཤུགས་རྒྱས་མ་ཐུབ་པའི་ཚེ་སྲོག་ཆུང་ཆུང་ཞིག
ལས་དབང་གིས
ཁྲ་རབ་ཀྱི་ཞིང་ཁམས་འདི་ནས།
སླར་ཡང་ང་ལ་ཁྱེད་ཀྱིས་གསོན་ཤུགས་སྟེར།
བར་ཆད་ཀྱིས
ཁྱེད་དང་ངེད་གཉིས་ལྷན་འཛོམས་ཀྱི་ལས་སྐལ་ལ་གཡོ་འགུལ་ཐེབས།
ཅི་ཞིག་གི་ཕྱིར།
སྒེར་སེམས མཐོང་ཆུང་། བློ་མེད། ཁ་ཡག ངོ་ལོག
གྲང་རག་གི་སྤུ་གྲི་དག་དག
ཡིན་ནའང་།
དཔའ་བོ་ཡ་དཔའ་བོ།
ཁྱེད་རང་སྟོན་འཇུག་གི་སྤུ་གྲིའི་ཁ་ན།
གཏན་ཚིགས་ཀྱི་ལ་རྒྱ་སྲུང་མཁན་དང་།
ཆབ་མཐུན་ལ་སྨོན་ལམ་ཞུ་མཁན།
ན་ཟུག་གི་བཟོད་བསྲན་ཐུབ་པའི་ཁེར་རྐྱང་གི་དཔའ་བོ་ངོ་མ།
དེའི་ཕྱིར།
ཁྱེད་ཀྱི་ཡིད་མཚོའི་བཏིང་གི་ལྷག་བསམ་གངས་དཀར་དེ།
སྟོན་ཟླ་དང་པོའི་ཚེས་བཅུར།
ཆེད་དུ་བཀའ་དྲིན་གྱི་དབྱངས་རྟ་སྙན་མོ་ཞིག་དང་།
རྟེན་འབྲེལ་གྱི་ཞུ་ཚིག་ཐོག་མ།
བཀུས་པ་དང་ཆབ་ཏུ་ཁྱེད་ལ་ཕུལ།
ངའི་ཡིད་བཏིང་ན་འཚེར་བའི་གཟིམས་མེད་ཀྱི་མེ་ལྕེ་ལགས།
༢
གཟིམས་མེད་ཀྱི་མེ་ལྕེ་ལགས།
ཁྱེད་རང་མེ་ལྕེ་ཞིག
མེ་ལྕེ་ཡི་འོད་སྣང་རླབས་ཆེན་གྱི་བསྟན་བཅོས་ཤིག
ང་རང་གཉོམས་ལག་མ་རྒྱས་པའི་ཤིང་སྡོང་ཆུང་ཆུང་ཞིག
ཁྱེད་ཀྱི་བསྟན་བཅོས་ཀྱིས།
ངའི་མི་གཙང་བའི་ལུས་ངག་ཡིད་གསུམ་གཞོམ་པར་ནུས།
འོན་ཀྱང་ཅི་ཞིག་གི་ཕྱིར།
བསྟན་བཅོས་ཀྱིས།
ཆེས་མཇུག་མཐར་ངའི་མི་གཙང་བའི་ལུས་ངག་ཡིད་གསུམ་གཞོམ་པར་ནུས་མ་བྱུང་།
ངའི་སྒེར་སེམས་ཀྱི་ལྡང་མིག་རྣོན་པོས།
ཁྱོད་ཀྱི་གཙང་ཞིང་དཀར་བའི་ནང་རོལ་ལ།
ཆེས་བཙོག་པའི་ནག་ཐིག་བཞག
གང་ལྟར།
དུས་ཚོད་འདིར།
ངས་ཁྱེད་ལ་སླར་ཡང་དགོངས་དག་ཞུ་འདོད།
ངའི་གུས་པར་འོས་པའི་གཟིམས་མེད་ཀྱི་མེ་ལྕེ་ལགས།
ཡིད་བཏིང་ནས་དགོངས་དག་ཞུ།
དགུ་ཟླ་བཅུ་བ་དུས་གཏན་དུ་
ཁྱེད་ལ་དཀའ་དྲིན་དང་དགོངས་དག་ཞུ་བས་ལེགས་སྐྱེས་ལ་ཕུལ།
2012.9.10༼མཐོ་འབྲིང་གཉིས་པའི་སྐབས་དགེ་རྒན་ལགས་ལ་ཕུལ།༽
