我仲好清楚记得第一日见猪既情景，果日系2011年9月12日，911第二日。一早车左去系沙田某屋苑等我朋友，佢唔知咩原因要放弃猪，我又胆粗粗甘应承佢，而开始左我一家同猪奇妙既缘份。第一眼见佢，系一只啡啡瘦瘦既小狗，跟住系我朋友既脚边，乸口乸面，紧紧张张甘。我落车同佢打招呼佢仲低住头呢系朋友既脚後，过左无一阵佢就已经坐系纸箱里面搭紧我车返企（当然唔系相中果个丫，边会甘开心）。小狗系通人性既动物，佢其实已经知咩事，不情愿亦无办法甘开始左跟住我生活既日子，好庆幸佢系快乐既。
猪之前我未养过小狗，之後一发不可收拾，陆陆续续有其他队友加入左佢既队伍。唔知系咪出左名老衬定好伙食，朋友介绍朋友甘都招收左好几个队员，大部份都系唐狗，有的仲系自来狗，全部都好乖，对人又有礼貌，旨意佢地看门口就凶多吉少（不过见到佢地个样你地会匪夷所思）。平时都系住系我新界个仓度，放假先会去我企住返几日甘，最锺意跳哂上我车度游车河，搞搞震阻住我揸车。
狗狗对人系绝对忠诚同信任，照顾佢地系一生一世既承诺，但系世界上依然好多人半途而废，遗弃动物日日发生。曾经有一段时间接收多左狗狗，我能力所限，一时疏忽我到现在依然深感悔究。有一个猪队友阿肥，生得眉清目秀，兼是金发鬼妹，一到埗已招来周遭公狗垂涎。我本人已经醒目问定阿肥已否绝育，但系不负责既人问都无谓，门禁深严亦挡唔住一众扯行哂既狗公。一个月後纸包唔住火，佢个肚大到摸到Ｄ馅，好彩徬徨之际得到好心人帮忙终身收养阿肥及小肥们，我亦都衷心祝福阿肥有头好住家。
又有一只系路边执返来既，有一晚收工开车走既见个同事系路口玩狗，我又再一次醒目地叫定唔好执返来，不过结果又。。。最衰果样系呢只狗狗两个月已经大只到无人钟意无人理，未打针未攞牌时染上致命既肠炎。好彩佢命好俾我发现，带左去医院留医成十日先好返，不过条数就。。。
我定期都有接触几个组织，有元朗既保护遗弃动物协会，有帮助唐狗流浪狗绝育既动物朋友（仲要系两位靓女），有办慈善训犬班既唐狗会，佢地无私既奉献我深深感动，我有时会用猪既名义去捐助佢地，可以帮助其他人亦帮猪积福。
猪你要保佑你既队友啊
