ལེགས་བཤད་ལམ་གྱི་རིམ་པའི་འགྲེལ་བ་ལེགས་ཉེས་གསལ་བའི་མེ་ལོང་ཞེས་བྱ་བ་བཞུགས་སོ།
ཉག་གཅིག་དོན་རྟོགས་སྟོན་པ་རྫོགས་སངས་རྒྱས། །
བདེན་གཉིས་ཟུང་འབྲེལ་ལུང་རྟོགས་འཕྲུལ་ངག་བོན། །
ས་གསུམ་རིམ་བགྲོད་གཤེན་རབ་སེམས་དཔའ་སྟེ། །
གནས་བཞི་ཀུན་འདུས་བསོད་གཡུང་བླ་མར་བསྟོད། །
འདི་ན་གཤེན་གྱི་ལེགས་བཤད་ལམ་རིམ་གྱི། །
འགྲེལ་བ་ལེགས་ཉེས་གསལ་བའི་མེ་ལོང་ཞེས། །
རང་གཞན་སྐལ་ལྡན་དགྱེས་པའི་གཏམ་བཟང་ཞིག །
སྤྲོ་འདིར་བསྟན་སྲུང་རྒྱ་མཚོའི་སྐྱོངས་ཤིག་ཀྱེ། །
ལེགས་བཤད་དུག་དུ་མཐོང་བའི་རིགས་རྣམས་ལ། །
འཆད་པའི་དགོས་པ་ཉིན་སྐར་དངོས་ཡིན་མོད། །
གང་ཞིག་ལེགས་པའི་ལམ་དུ་འཇུག་འདོད་རྣམས། །
དགའ་དད་མོས་པའི་ངང་ནས་འདིར་འཇུག་འཚལ། །
དེ་ལྟར་ལེགས་བཤད་ལམ་གྱི་རིམ་པ་ཞེས་བྱ་བ་ཚིག་བར་བདུན་ལ་ཤད་བར་དུ་བགྱིས་པ་ཤོ་ལོ་ཀ་དྲུག་ཅུ་རྩ་བརྒྱད་པ་ཞེས་གཞུང་འདིའི་མཚན་སྨོས་ཤིང་། དེ་ཡང་ལེགས་བཤད་ནི་ལེགས་པར་བཤད་པ་སྟེ་བླང་དོར་གྱི་གནས་མ་འཁྲུལ་བར་འཆད་པའོ། ལམ་གྱི་རིམ་པ་ཞེས་དོན་གྱི་སྒོ་ནས་བཏགས་པ་སྟེ། ལེགས་བཤད་འདི་ཉམས་སུ་བླང་བ་ལ་བསྟེན་ནས་འཁོར་བར་ཞེན་པ་ལོག། ཐར་པར་ངེས་འབྱུང་སྐྱེ། ཡུལ་ཁྱད་པར་ཅན་ལ་དད་པ་དང་འགྲོ་ལ་སེམས་བསྐྱེད། བདག་མེད་རྟོགས་པའི་ཤེས་རབ་སོགས་རྒྱུད་ལ་སྐྱེ་ནས་ཐར་པའི་ལམ་བགྲོད་པར་བྱ་བའི་ཕྱིད་དུའོ། དེ་ལྟའི་ལེགས་བཤད་དེ་ཡང་ཚིག་བར་བདུན་རེ་ལ་ཤད་བར་དུ་བགྱིས་པ་དང་། ཤད་བར་བཞི་ལ་ཤོ་ལོ་ཀ་རེ་སྟེ་ཤོ་ལོ་ཀ་དྲུག་ཅུ་རྩ་བརྒྱད་པ་ཞེས་གྲངས་ཀྱི་སྒོ་ནས་མཚན་སྨོས་པ་དེ་ཉིད་ལ་འགྲེལ་བ་ལེགས་ཉེས་གསལ་བའི་མེ་ལོང་ཞེས་ཅུང་ཙམ་སྤྲོ་བར་འདོད་པ་ལ།
དེ་ཡང་སྤྱི་འགྲོས་ལྟར་གཞུང་འདི་ལ་ཡང་གསུམ་སྟེ། སྔོན་འགྲོ་ཀླད་ཀྱི་དོན་དང་། དངོས་གཞི་གཞུང་གི་དོན། རྗེས་བྱ་མཇུག་གི་དོན་ནོ། དང་པོ་ལ་གསུམ་ལས། དང་པོ་ལ།
༧ དྲི་མེད་སྐུ་སྟེ་ཤེས་བྱ་མཁྱེན། །
འཕྲུལ་ངག་བདེན་པའི་ཐར་ལམ་སྟོན། །
ཉོན་ཤེས་བྱང་སྦྱོང་འགྲོ་ལ་བརྩེ། །
སྐྱབས་གནས་གསུམ་ལ་ཕྱག་འཚལ་ལོ། །
ཞེས་པ་སྟེ། ཡེ་ནས་སྐྱོན་དང་དྲི་མ་མེད་པའི་སྐུ་མངའ་ཞིང་ཤེས་བྱ་ཐམས་ཅད་ཇི་ལྟ་ཇི་སྙེད་མཁྱེན་པ་སྟེ་རྫོགས་པའི་སངས་རྒྱས་དང་། འཕྲུལ་དང་འདྲ་བའི་ངག་འདིས་ནི་བསླུ་བར་མི་འགྱུར་ཞིང་བདེན་པའི་སྒོ་ནས་ཐར་པའི་ལམ་སྟོན་པར་བྱེད་དེ་དེ་ནི་ལུང་རྟོགས་གཉིས་ཀྱི་བསྡུས་པའི་གཡུང་དྲུང་གི་བོན་དང་།
སྒྲིབ་པ་གཉིས་ཏེ་ཉོན་མོངས་པའི་སྒྲིབ་པ་བྱང་ཞིང་ཤེས་བྱའི་སྒྲིབ་པ་སྦྱོང་ཀྱིན་མཆིས་ཤིང་འགྲོ་བ་ལ་སེམས་རབ་ཏུ་བརྩེ་བའི་རྒྱལ་སྲས་གཡུང་དྲུང་སེམས་དཔའི་ཚོགས་སྟེ། སྐྱབས་གནས་དཀོན་མཆོག་གསུམ་ལ་སྒོ་གསུམ་གུས་པས་སྒོ་ནས་རང་ཉིད་ཀྱི་མ་དག་པའི་སྡིག་སྒྲིབ་ཡོད་དོ་ཅག་ཕྱག་པར་འཚལ་ལོ་ཞེས་
སྐྱབས་གནས་དཀོན་མཆོག་གསུམ་ལ་མཆོད་པར་བརྗོད་པའོ། དེ་ལྟར་བརྗོད་པ་ལ་དགོས་པ་ཡོད་དེ། སྐྱབས་གནས་ཀྱིས་རྗེས་སུ་འཛིན་པ། དམ་གོང་མའི་ལུགས་དང་མཐུན་པ། བསྟན་བཅོས་རྩོམ་པ་ལ་བར་ཆད་མི་འབྱུང་བ་སོགས་ཡིན་ནོ།
གཉིས་པ་ལ།
༧ བློ་གྲོས་ལྡན་པའི་ཤེས་རབ་ཀྱིས། །
མི་ཤེས་བློ་མུན་རབ་རིབ་བསལ། །
སྙན་པའི་ངག་དང་ཚིག་བསྡེབས་ནས། །
གཞན་ཕན་ཕྱིར་དུ་ལེགས་པར་བཤད། །
ཞེས་པ་སྟེ། བློ་གྲོས་དང་ལྡན་པའི་གང་ཟག་དེས་རང་ཉིད་ཀྱི་ལེགས་ཉེས་བླང་དོར་ལ་མ་རྨོངས་པའི་ཤེས་རབ་ལ་བསྟེན་ནས། རང་རྒྱུད་ཀྱི་སྤང་བླང་མི་ཤེས་པའི་བློ་ཡི་མུན་པ་སྟེ་དྲི་མ་དང་འདྲ་བའི་རབ་རིབ་རྣམས་བསལ་བའམ་མེད་པར་བྱེད་པ་ཡིན་ཀྱི། དེས་ན་ཁོ་བོས་ཀྱང་སྙན་པའི་ངག་དང་ཚིག་ལྷན་དུ་བསྡེབས་ནས། གཞན་དག་ལ་ཕན་པའི་ཕྱིར་དུ་བླང་དོར་གྱི་གནས་གསལ་བར་ལྟོན་པའི་ལེགས་བཤད་ཅིག་འདི་ནས་འཆད་པའམ་འབྲི་བར་བྱའོ་ཞེས་བཤད་པར་དམ་བཅས་པའོ། དེ་ལ་ཡང་དགོས་པ་ཡོད་དེ། བཤད་པ་མཐར་ཕྱིན་པ་དང་། རྩོམ་པ་ལེ་ལོའི་དབང་དུ་མི་འཆོར་བ། དགེ་བ་ཡང་དག་འགྲུབ་པ་བཅས་ཡོད་དོ།
གསུམ་པ་ནི།
༧ ཆུ་ཤེལ་ལས་གྲུབ་བསིལ་ལྡན་པས། །
ཆུ་སྐྱེས་པད་མོའི་ཁ་འབྱེད་ལྟར། །
སངས་རྒྱས་བཀའ་དང་དམ་པའི་ལུང་། །
དེས་ནི་བློ་གསལ་ཤེས་རབ་འབྱེད། །
ཞེས་པ་སྟེ། ཆུ་ཤེལ་ལས་གྲུབ་ཅིང་བསིལ་བ་དང་ལྡན་པ་སྟེ་ཟླ་བའི་མངོན་བརྗོད་དུ་བྱ་ཞིང་། དེ་འདྲའི་ཟླ་བ་དེ་ཉིད་ཀྱིས་ཆུ་སྐྱེས་ཏེ་མེ་ཏོག་པད་མོའི་ཁ་འབྱེད་པར་བྱེད་པ་ལྟར་དུ། རྒྱལ་བ་རྫོགས་པའི་སངས་རྒྱས་ཀྱི་བཀའ་དང་རྗེས་འཇུག་འཕགས་མཆོག་དམ་པ་དག་གི་ལུང་དེ་དག་གིས་ནི། བློ་གསར་རྣམས་ཀྱི་བློ་སྒོའམ་ཤེས་རབ་ཀྱི་སྒོ་མོ་འབྱེད་པར་བྱེད་པས། དེས་ན་ཁོ་བོས་འདིར་ཡང་བློ་གསར་གྱི་ཤེས་རབ་འབྱེད་པའི་བཀའ་ལུང་དག་གི་ཉིང་བཅུད་ལེགས་པར་བཤད་པ་ཡིན་པས། བློ་གསར་རྣམས་དགའ་དད་མོས་པའི་སྒོ་ནས་འཇུག་པར་ཤིན་ཏུ་གཅེས་པའོ་ཞེས་ཤུགས་ལ་བློ་ལྡན་ཉན་པར་བསྐུལ་བའོ། དགོས་པ་ནི། གདུལ་བྱ་ལམ་ལ་འཁྲིད་པ་དང་། བརྩམ་པ་དོན་ཡོད་འགྱུར་བ་སོགས་ཡོད་དོ། དོན་དང་པོ་ཀླད་ཀྱི་དོན་བསྟན་པའོ།
གཉིས་པ་གཞུང་གི་དོན་བཅུ་གཉིས་ལས། དང་པོ་བླ་མ་བསྟན་པ་ལ།
༧ ཆུ་བོ་ཆེན་པོ་བསྟེན་བྱས་ན། །
སྐོམ་པའི་གདུང་བ་སེལ་བཞིན་དུ། །
བླ་མ་དམ་པ་བསྟེན་བྱས་ན། །
གདམས་ངག་འདོད་པའི་གདུང་བ་སེལ། །
ཞེས་པ་སྟེ། གང་ཞིག་གང་ཟག་སྐོམ་པའི་གདུང་བ་ཞིག་གི། ཚ་གདུང་སེལ་བར་བྱེད་པའི་ཆུ་བོ་ཆེན་པོ་དེ་བཏུང་བའམ་བསྟེན་པར་བྱས་ན། ཁ་སྐོམ་པའི་གདུང་བ་དེ་ཉིད་སེལ་བར་བྱེད་པ་ནང་བཞིན་ཏུ། ངན་སོང་འཁོར་བའི་གནས་ལས་ཐར་ནས་མཐོ་རིས་ཐར་པའི་གོ་འཕངས་ཐོབ་པར་བྱེད་པའི་གདམས་པ་ཟབ་མོ་འདོད་པའི་སྐྱེ་བུ་དེ་ཉིད་ཀྱི། སྲིད་ཞི་གཉིས་ཀྱི་བླ་རུ་གྱུར་ཅིང་ཁམས་གསུམ་སེམས་ཅན་ལ་མ་ལྟར་བྱམས་པའི་བླ་མ་དམ་པ་དེ་ལ་བསྟེན་པར་བྱས་ན།
གདམས་ངག་ཟབ་མོ་འདོད་པའི་གདུང་བ་དེ་མྱུར་དུ་སེལ་བར་བྱེད་དོ།
༧ ལྗོན་ཤིང་ལ་བསྟེན་དབྱི་མོང་དེ། །
དེ་ཉིད་གར་སྐྱེས་དེ་ཡིས་སླེབ། །
བླ་མ་ལ་བསྟེན་གང་ཟག་དེ། །
ཡོན་ཏན་རིམ་པ་དེ་བཞིན་འབྱུང་། །
ཞེས་པ་སྟེ། དབྱི་མོང་ངམ་འཁྲིལ་ཤིང་དེ་ཉིད་ཤིན་ཏུ་སྐྱེ་སྟོབས་ཆེ་ན་ཡང་ལྗོན་ཤིང་གཞན་ཞིག་ལ་མ་བསྟེན་ན་སྐྱེ་མི་ཐུབ་ཅིང་། གལ་ཏེ་གཞན་ཞིག་ལ་བསྟེན་ན་དེ་འདྲའི་དབྱི་མོང་དེ་ལྗོན་ཤིང་གཞན་དེ་གར་ཙམ་སྐྱེས་ཀྱང་དེ་དང་མཉམ་པོར་སླེབ་ཐུབ་པའམ་སྐྱེས་ཐུབ་པ་བཞིན་ཏུ། བླ་མ་དམ་པ་ལ་བསྟེན་པའི་གང་ཟག་དེ་ཡང་། ཡོན་ཏན་གྱི་རིམ་པ་ཡང་དམ་པ་དེ་ནང་བཞིན་ཅིག་འབྱུང་ཐུབ་པ་བསྟན་པའོ།
༧ པད་མོའི་ཚོགས་ལ་སྦྲང་རྩི་གནས། །
མོས་པའི་བུང་བ་དེ་ལ་འཁོར། །
སྐྱེས་བུ་དམ་པ་ཡོན་ཏན་མཛོད། །
དད་ལྡན་བློ་གསལ་དེ་ལ་འཁོར། །
ཞེས་པ་སྟེ། དེ་ཡང་མེ་ཏོག་པད་མོའི་ཚོགས་ལ་རྩི་བཅུད་དམ་སྦྲང་རྩི་གནས་ཤིང་། རྩི་བཅུད་རྔུབ་པའམ་འཐུང་བར་མོས་པའི་སྦྲང་མའི་ཁྱུ་ཚོགས་པད་མོ་དེ་ལ་ཡང་ཡང་འཁོར་བ་ལྟར་དུ། སྐྱེས་བུ་དམ་པ་སྟེ་བླ་མ་དེ་ཉིད་ནི་རིག་གནས་ཡོན་ཏན་ཀུན་གྱི་མཛོད་དང་འདྲ་བའི། ཡུལ་ཁྱད་པར་ཅན་དང་ཐར་ལམ་སྟོན་བྱེད་ཀྱི་གདམས་པ་ཟབ་མོ་དག་ལ་དད་པ་དང་ལྡན་ཞིང་། ཐོས་བསམ་གྱི་ཤེས་རབ་མངའ་བའི་བློ་གསལ་རྣམས་ནི་མཚན་ལྡན་བླ་མ་དམ་པ་ལ་མོས་ཤིང་འཁོར་བར་གྱུར་ཡོད་པའོ།
༧ དྲི་ཞིམ་སྨན་གྱི་སྡོང་པོ་ལ། །
དྲི་ངན་ངང་གི་མི་གནས་བཞིན། །
མཚན་ཉིད་ལྡན་པའི་སྐྱེས་བུ་ལ། །
གནོད་པ་ངང་གི་མི་གནས་སོ། །
ཞེས་པས་ནི། དེ་ཡང་དྲི་མ་ཞིམ་པ་ཙན་ཏན་དང་སྨན་གྱི་སྡོང་པོ་ལྟ་བུ་ལ་དྲི་མི་ཞིམ་པ་དང་དྲི་མ་ངན་པ་ངང་ངམ་ཤིག་གི་མི་གནས་པའམ་མེད་པ་ནང་བཞིན་ཏུ།
མཚན་ཉིད་དམ་ཚུལ་དང་ལྡན་པའི་སྐྱེས་བུ་དེ་ལ་ནི། གདུལ་བྱ་འགྲོ་བ་མཐའ་དག་ལ་གནོད་པའི་བྱ་བ་ཀུན་སློང་དང་བཅས་པ་རང་བཞིན་གྱི་མེད་པ་ཡིན་ནོ་ཞེས་དང་། དེ་ལ་མཚན་ཉིད་དང་ལྡན་པ་ནི་མདོ་རྒྱུད་དག་ལས་མཚན་ཉིད་བཅོ་ལྔ་དང་མཚན་ཉིད་སུམ་ཅུ་སོགས་བཤད་པ་མང་མོད་ཀྱི།
སྐབས་འདིར་གོ་བདེ་བའི་དབང་དུ་བྱས་ན། རྗེ་བཙུན་དམ་པ་དགོང་མཇོད་རི་ཁྲོད་པའི་ཞལ་ནས། ཐ་ན་སེམས་བསྐྱེད་གཅིག་པུས་ཀྱང་། གཞན་ལ་འཆད་ཉན་བྱེད་དུ་རུང་། ཞེས་གསུང་པ་བཞིན་གདུལ་བྱ་སེམས་ཅན་དང་དགོས་སུ་རང་གི་བུ་སློབ་ལ་ཕན་ཐོག་འདོད་ཀྱི་ཀུན་སློང་བཅོ་མ་མ་ཡིན་པ་ཞིག་ཡོད་ན་དེས་ཆོག་པ་ཡིན་ལ། དེ་ལྟའི་སེམས་བསྐྱེད་དེ་ནི་བོན་འཆད་མཁན་བླ་མ་དེ་ཉིད་ལ་མེད་ན་ཐབས་ཆག། ཡོད་ན་དེ་གཅིག་པུས་ཆོག་པ་ཡིན་ནོ།
དེ་ལྟར་བླ་མ་བསྟེན་པའི་དགོས་པ་ནི། རིག་པའི་བློ་སྒོ་འབྱེད་པ་དང་། ཤེས་རབ་གོང་ནས་གོང་དུ་འཕེལ་བདང་། ཚེ་འདི་དང་ཕྱི་མ་གཉིས་ཀྱི་དོན་བཟང་འགྲུབ་པ་སོགས་ནི་དགོས་པའོ། དེ་ལྟར་རང་རྒྱུད་ཀྱི་སྐྱོན་ཟད་ཅིང་ཡོན་ཏན་འཕེལ་བའི་ཐབས་ཁྱད་པད་ཅན་ནི། དགེ་སྡིག་གི་སློབ་དཔོན་ལ་བསྟེན་ཞིང་དེས་རྗེས་སུ་འཇུག་ནས་བླང་དོར་བྱ་དགོས་ཕྱིར། གྲོགས་སམ་སློབ་དཔོན་བཟང་པོ་ལ་བསྟེན་པ་གལ་ཤིན་ཏུ་ནས་ཆེའོ། གཞུང་དོན་དང་པོ་བླ་མ་བསྟན་པའོ།
