正系荔枝当造，满街果红香飘。谂起细路哥嗰时嘅谜语童谣：红布包白布，白布包猪膏，猪膏包红枣。觉得真系盏鬼趣致。重有粤剧大师红线女唱嗰只《荔枝颂》，直情系由细听到大，好听到耳油出。其中几句歌词重记得好清晰：身外是张花红被，轻纱薄锦玉团儿，入口甘美，齿颊留香世上稀。
其实讲到荔枝歌和诗词，最耳熟能详嘅应该系唐代诗人杜牧嗰首《过华清宫》嘅其中两句：一骑红尘妃子笑， 无人知是荔枝来。据闻唐玄宗嘅贵妃杨玉环喜食荔枝成癖，唐明皇特令人从荔枝产地千里飞骑用快马传送鲜荔。真系够嗮大阵仗。不过，使我哋岭南人倍感亲切同自豪嘅，重系宋代苏东坡“日啖荔枝三百颗，不辞长作岭南人”嘅两句诗。佢当时被朝廷以“讥斥先朝”嘅罪名被贬岭南，“不得签书公事”。于是，东坡先生流连风景，体察风物，对岭南产生了深深嘅热爱之情，连岭南地区极为平常嘅荔枝都爱得咁执着。真系令人感动。
不过，最近网上有人话：日啖荔枝三百颗其实是苏东坡对广州话嘅误读，还原成广州话，应该是"一啖荔枝三把火"先啱，若一天之内狂吞三百颗荔枝，体内便会燃起毒火总计九百把，好哋哋一个人，必定会畀"烧"到一佛出世，二佛升天"。对此，我认为系无稽之谈，所谓日啖三百，不过系形容因为中意食而多食咗啲而已，以苏东坡大学士嘅学识，又点会真系食咗三百个咁低章呢？的确，荔枝性甘温，具有补气养精、散寒行气嘅作用，阴虚体质嘅人，特别系患有慢性扁桃体炎、咽喉炎嘅人，多食荔枝会加重"虚火"，故民间有"一个荔枝三把火"嘅说法。所以，荔枝歌可以多唱，荔枝果唔好多食。食荔枝前后不妨饮一啲盐水或凉茶、绿豆水、冬瓜水、生地汤等，预防"上火"。亦可以按《本草纲目》嘅说法，摞一碗蜂蜜水或荔枝壳煮水服用。
荔枝有大年小年之分。 今年虽然系小年，各荔枝产区依然大搞荔枝节，有啲重征集荔枝歌，邀请去果园现场活动。于是我都唔执输，整番首献丑：荔枝树铺满咗山头，荔枝果挂满咗枝头。红啦，红啦，荔枝嘅脸已红透，好似羞涩嘅姑娘，等到出嫁嘅时候。醉啦，醉啦，果农嘅心已醉够。最痛快亦莫过于——饮番自己酿造嘅美酒。 荔枝树红遍咗山头，荔枝香飘上咗云头。熟啰，熟啰，荔枝今年又丰收，带上箩筐同绳索，开始下果嘅时候。甜啰，甜啰，果农嘅心已甜透，再喜悦亦大不过——品尝劳动果实嘅享受。
