ས་ཟླའི་བཅོ་ལྔའི་བོད་ཀྱི་མཐོང་ཐོས།
__སྨྱུ་གུ
༼༡ ༽དེ་རིང་ས་ཟླའི་ཚེས་པ་བཅོ་ལྔ་རེད།།ལྷ་ལྡན་གྲོང་དུ་འཁྲུག་ཆ་དོད་དུས་རེད།།ད་ནངས་ཆུ་ཚོད་དྲུག་པ་ཕྱེད་ཀ་ནས།།ང་རང་མི་ཚོགས་རྒྱ་མཚོའི་ཀློང་དུ་ཞུགས།།ད་ལྟ་ཕྱི་དྲོའི་ཆུ་ཚོད་བདུན་པ་རེད།།རྔུལ་ནག་ཤིག་སེ་གཞི་ནས་རང་གནས་འབྱོར།།ཆུ་དྭངས་ཕོར་གང་ཐུང་ནས་ངལ་ཞིག་གསོ།།དེ་ནས་དེ་རིང་མཐོང་ཐོས་གཏམ་དུ་བྱ།།༼༢༽འབྲས་སེ་དགའ་གསུམ་ཕོ་བྲང་པོ་ཏཱ་ལ།།བར་སྐོར་གླིང་སྐོར་རྩེ་སྐོར་གཙུག་ལག་ཁང་།།ག་ས་ག་རུ་མི་ཚོགས་འཕྱུར་བའི་དཔེར།།མཁའ་ནས་ཆར་སྤྲིན་སྟུག་པོ་འཁྲིགས་པའམ།།ས་ནས་གཙང་ཆེན་དལ་གྱིས་བཞུར་དང་མཚུང།།༼༣༽མ་དྲིས་གཞན་གྱི་སྐད་ཆ་ཉན་པས་ན།།དེ་རིང་ཁྱད་འཕགས་དུས་ཆེན་རེད་ཟེར་ནས།།ཟ་ཁང་ཚོང་ཁང་ཡོད་ཚད་སྒོ་རྒྱབ་སྐད།།ས་ལས་རྡོ་ལས་ཡོད་ཚད་མཚམས་གཞག་སྐད།།བཟོ་གྲྭ་སློབ་གྲྭ་ཕལ་ཆེར་ངལ་གསོས་སྐད།།འགྲོ་མི་ཐུབ་པའི་ཕ་མ་རྒས་ཁོག་ལ།།དེ་རིང་ཟས་བཅད་སྨྱུང་གནས་བསྲུང་བཅུག་ནས།།བུ་ཕྲུག་ཕྲེང་བ་ཐོགས་ནས་ཆས་ཡོད་སྐད།།ཟུག་ངུ་ནད་ཀྱིས་མནར་བའི་ནད་པ་ལ།།དེ་རིང་སྡུག་རུས་དགོས་ཞེས་བཀའ་བསྒོས་ནས།།ནད་གཡོག་ལག་སྐོར་ཁྱེར་ནས་འདུར་ཡོད་སྐད།།གཞོན་སྐྱེས་དར་གོས་གྱོན་ནས་འཕུར་ཡོད་སྐད།།ལོ་ལོན་མཁར་བར་ཁེན་ནས་ནུར་ཡོད་སྐད།།ཡོད་པོ་རླངས་འཁོར་བསྐོར་ནས་ལྡིང་ཡོད་སྐད།།མེད་པོ་རྐང་ཐང་བང་ཁ་རྫོགས་ཡོད་སྐད།།ཡོད་ཚད་ཕྱག་སྐོར་ལྷ་མཇལ་ཕེབས་ཡོད་སྐད།།ལོ་འཁོར་གཅིག་གི་ཡོང་འབབ་བསྣམས་ཕེབས་སྐད།།༼༤༽ཡར་གྱི་ལྷ་ལ་ཞལ་གསེར་བསྒྲོན་ཡོད་སྐད།།ཇོ་ཤཀ་གསུམ་དང་སེ་རའི་རྟ་མགྲིན་དང་།།པད་འབྱུང་བྱམས་ཆེན་གྲྭ་བཞི་ལྷ་མོ་སོགས།།ངོ་སོ་མཐོ་བའི་ལྷ་སྐུ་འགའ་ཞིག་ལ།།ཕངས་མེད་གསེར་གྱི་ཞལ་བ་བྱུག་དྲག་ནས།།ཤངས་དང་སྤྱན་ལ་སྒང་གཤོང་མེད་སྐད་རེད།།༼༥༽བར་གྱི་དགེ་འདུན་བསྙེན་བཀུར་ཞུས་ཡོད་སྐད།།སྤྱི་སྒོས་བདེ་རྩར་སེམས་མིན་མི་ཤེས་མོད།།ང་ཡིས་སྒོར་ལྔ་ཁོང་གིས་བཅུ་ཉི་ཤུ།།གཞན་དང་གཞན་གྱིས་བརྒྱ་དང་ཉིས་བརྒྱ་བཅས།།དེ་དང་དེ་བཞིན་འགྲན་རྩོད་རླབས་རྩེ་ནས།།གྲྭ་ས་ཁག་ཏུ་སྒོར་མོའི་ཆར་ཕབས་སྐད།།ལྷ་སའི་དགོན་སྡེའི་སྒོར་མོའི་སྤམ་ཁ་དེ།།བོད་ལྗོངས་དངུལ་ཁང་ཁག་ལས་མཐུག་ཡོད་སྐད།།འོན་ཀྱང་དགོན་པའི་སྒོར་མོ་དེ་དག་ནི།།ས་དང་རྡོ་ལ་ཅུང་ཟད་སྟིམས་པ་ལས།།ནད་བཅོས་དམན་སྐྱོབ་སློབ་གསོའི་རོགས་དངུལ་སོགས།།སྤྱི་ཚོགས་ཕན་བདེའི་རྒྱུ་ལ་གཏོང་མེད་སྐད།།༼༦༽མར་གྱི་སྤྲང་ལ་སྦྱིན་པ་གཏོང་ཡོད་སྐད།།སྤྲང་པོས་སྐོར་ལམ་ཕར་ཆེར་འཁོར་ཡོད་སྐད།།སྤྲང་ཕྲུག་དེ་ཚོས་སྒོར་མོ་མི་སྟེར་ན།།སྒོར་ཟུར་མི་ལེན་དམ་བཅའ་བཞགས་ཡོད་སྐད།།སྤྲང་རྒན་དེ་ཚོས་བཅོལ་དངུལ་གསོག་ཚད་ནི།།ལྷ་སའི་འབྱོར་ལྡན་འགའ་ལས་བརྒལ་ཡོད་སྐད།།ད་དུང་བོད་མིའི་སྙིང་རྗེ་ཕྱི་ཤུན་དེ།།མ་རལ་དེ་སྲིད་བཙན་པོའི་ཕྱི་རབས་ཚོས།།བྱིས་པས་སློབ་གྲྭ་དར་མས་བྱ་གཞག་དང་།།རོང་པས་ཞིང་ལས་འབྲོག་པས་དཀར་ལས་སོགས།།ཡོད་ཚད་སྐྱུར་ནས་འབད་བརྩོན་མི་དགོས་པའི།།གཞན་བརྟེན་འཚོ་ཐབས་སྤྲང་ལམ་ཞུགས་འགྲོ་སྐད།།༼༧༽མི་ཡི་ཚེ་སྲོག་སྒོར་ལ་ཐུག་པའི་དུས།།སྲོག་བསླུ་བྱེད་རབས་བོད་ན་མ་གོ་མོད།།དེ་རིང་བྱ་ཉ་སྲོག་བསླུའི་གཏོང་གྲངས་དེ།།སྒོར་མོ་ས་ཡ་བྱེ་བ་བརྒལ་ཡོད་སྐད།།ཉ་ཚོང་རྒས་མོའི་གླུ་ཆུང་ལེན་བཞིན་དུ།།སྒོར་མོ་དངུལ་ཁང་ཕྱོགས་ལ་དབོར་ཡོད་སྐད།།ད་དུང་དེ་ལས་མང་བའི་བྱ་དང་ཉ།།བོད་ན་འདྲེན་རྒྱུའི་མངག་ཐོ་བསྐུར་ཚར་སྐད།།ཚ་ཁུལ་ཆུ་ལ་གནས་པའི་ཉ་ཡི་སྲོག།ཚ་དམྱལ་སྣུམ་སྲེག་ཀློང་ནས་མ་ཤོར་ཀྱང་།།གྲང་ངར་ཆེ་བའི་གངས་ཁྲོད་འཁྱག་ཀླུང་ན།།གྲང་ཤི་མ་ཐེབས་གསོན་པ་གཅིག་ཀྱང་མེད།།༼༨༽ཉིས་བསྟར་སུམ་བསྟར་བསྒྲིག་པའི་མཇལ་པ་ཚོའི།།སྤྱན་བཙུམ་ཐར་སྦྱར་ཚུགས་ཀ་མཛེས་ཡོད་སྐད།།ལག་སྐོར་ཕྲེང་བའི་སྟང་སྟབས་ཡག་ཡོད་སྐད།།གསོལ་བ་སྨོན་པའི་འདོན་དབྱངས་སྙན་ཡོད་སྐད།།འོན་ཀྱང་ཕུད་རྒྱག་ཅུང་ཙམ་ཐེབས་པས་ན།།སྡང་མིག་གློག་དམར་འདྲ་ཞིག་འཁྱུག་ཚར་སྐད།།རྒྱབ་ནས་མཚང་ཁ་ཕྲན་ཙམ་རྒྱབ་པས་ན།།ངར་གཏམ་སེར་བ་འདྲ་ཞིག་ཕབས་ཚར་སྐད།།༼༩༽ཉིན་འདིའི་ཕྱག་སྐོར་མཆོད་མཇལ་ཚར་མ་ཐག།བཙན་པོ་སུ་ཡི་ཁྲིམས་ལས་ཐར་བ་ལྟར།།ཧ་རོ་ཨུ་ཤུ་ས་ཟླའི་ཡར་ཚེས་དེ།།དེ་རིང་གཞི་ནས་རྫོགས་སོང་ད་ཡིན་ན།།ཞོགས་ཉལ་རྒྱག་ཆོག་ཤ་མོག་ཟ་ཆོག་ཟེར།།དགའ་སྤྲོ་སེམས་ལ་མ་ཤོང་ཕྱིར་ལུད་སྐད།།༼༡༠༽གོམས་སྲོལ་གཡམ་རྒྱུག་བོད་མིའི་ཕྱི་ཆོས་འདིས།།ལྷ་ལ་དད་ཀྱང་ལྷ་ཡི་གྲལ་མི་ཚུད།།མི་རུ་སྐྱེས་ཀྱང་མི་ཡི་གྲལ་ནས་འབུད།།འདི་ཕྱི་གཉིས་མེད་གསོན་པོའི་བར་དོ་ནས།།མྱུར་དུ་ཐར་བའི་ལམ་ཞིག་སུ་ཡིས་བསྟན།།
