བོད་པའི་མ་ཡུམ།
མོ་ལུས་ནི་མ་ཡུམ་ཞིག་གི་ལས་དབང་རེད།མོ་ལུས་ནི་བུ་ཕྲུག་ཅིག་གི་སྙིང་དུ་སྡུག་པའི་མ་ཡུམ་རེད།མ་ཡུམ་ནི་རླབས་ཆེན་གྱི་ཚེ་སྲོག་སྐྲུན་མཁན་རེད།
མ་ཡུམ་གྱི་མཚན་བྱང་འདི་ཐོས་མ་ཐག་གོང་དཔོན་པོ་བླ་མ་དང་བར་སྐྱ་སེར་ཕོ་མོ་སུ་ཞིག་ཡིན་ཡང་རང་ཉིད་ཀྱི་མ་ཡུམ་དྲན་པ་ཙམ་གྱིས་སྙིང་ལ་རླབས་ཆེན་གྱི་མི་སྣ་ཞིག་ཡིན་སྣང་སྐྱེ་ལ་ཁ་ནས་ཡང་དཔེ་འགོད་གཟུགས་འགོད་གང་འཚམ་རེ་བྱས་ཏེ་མི་རིགས་ཤིག་གི་བླ་སྲོག་ལ་གྱུར་བ་ཡོད་ཚད་མ་ཡུམ་གྱི་ཚིག་འབྲི་གཉིས་པོ་འདི་བཀོད་ནས་ཆེ་བརྗོད་བྱེད།ཡིན་ནའང་།དོན་ངོ་མར་བླ་སྲོག་ལ་གྱུར་བའི་མ་ཡུམ་དེའི་བདེ་སྡུག་དང་གུ་དོགས་པའི་བསམ་བློ་ལ་མདུན་སྐྱོད་ཀྱི་མཁའ་དབུགས་ཤིག་བསྐྲུན་རྒྱུ་དང་།མོ་ལུས་ཤིག་ལའང་རླབས་ཆེ་བའི་མ་ཡུམ་ཞིག་གི་ཁྱད་ཆོས་ཡོད་པ་དེ་གོ་རྟོགས་ཡང་དག་ཅིག་བྱུང་ཡོད་དམ།བུ་ཕྲུག་དེ་འཚར་ལོངས་བྱུང་བའི་བརྒྱུད་རིམ་ཁྲོད་དུ་མ་ཡུམ་ལགས་ཀྱི་བྱམས་བརྩེ་ནི་སུ་ཞིག་གིས་ཀྱང་ཚབ་བྱེད་ཐབས་མེད་པ་ཞིག་དང་།མ་ཡུམ་གྱི་འགྲོ་འདུག་སྤྱོད་གསུམ་ཚང་མ་བུ་ཕྲུག་གིས་ལད་ཟློས་བྱེད་ཀྱིན་ཡོད་ལ།མོའི་གསུངས་ངག་དེས་བུ་ཕྲུག་གི་མི་ཚེའི་ཁ་ཕྱོགས་དང་རྣམ་དཔྱོད་འཕེལ་འགྲིབ་སོགས་ལ་དམ་དུ་འབྲེལ་ཡོད་པ་དེ་དངོས་ཡོད་སྤྱི་ཚོགས་ན་སུ་ཡིས་སྣང་འཇོག་བྱས་ཡོད།
མ་ཡུམ་ནི་མོ་ལུས་བླངས་པ་ཡོད་ཚད་ཀྱིས་བྱས་ཆོག་ཀྱང་མ་ཡུམ་གྱི་འགན་འཁྲི་ནི་རང་འགར་ན་བ་ཚ་བའི་དཀའ་སྡུག་ལ་བསྲན་ནས་བུ་ཕྲུག་ཅིག་སྐྱེ་རུ་བཅུག་པ་ཁོ་ནས་མ་ཆོག་སྟེ།མོའི་འདུ་ཤེས་ལ་མོ་ལུས་ཤིག་གི་འགན་འཁྲི།ཨ་མ་ཞིག་གི་འགྲོ་འདུག་སྤྱོད་གསུམ།མདོར་ན་ཨ་མ་སྦྲུམ་མ་ཞིག་གི་དབང་བོ་ལྔ་ཡིས་འགུལ་སྤྱོད་ནི།བུ་ཕྲུག་ཅིག་གི་འབྱུང་འགྱུར་གྱི་ཤེས་པ་དང་འཇོན་ཐང་ལ་འབྲེལ་བའི་གོ་རྟོགས་དང་སྨྲ་ཤེས་ཤིང་དོན་གོ་བའི་མི་རིགས་ཤིག་གི་རྨོངས་མུན་སེལ་བའི་སྒྲོན་མེ་ཡིན་པའི་རང་རྟོགས་དགོས།འོན་ཏེ་ང་ཚོའི་རོང་འབྲོག་དམངས་ཚོགས་མང་ཆེ་བ་ད་དུང་ཡིག་རྨོངས་པའི་སྡེ་ན་ལུས་པས།ཁྱིམ་ཚང་ཞིག་གིས་ཨ་མ་སྦྲུམ་མ་ཞིག་ལ་ཧ་ཅང་གི་འགན་ཁུར་བྱས་ཡོད་ན་དེ་ནི་མ་བུ་གཉིས་ལ་བར་ཆད་ལམ་སེལ་གྱི་ཚུལ་དུ་ཆོས་ལུགས་ཀྱི་ཆོ་ག་བསྒྲུབས་ཡོད་པ་རེད།དེ་མིན་སྦྲུམ་མ་ཞིག་ལ་ཆེད་དུ་བསྒྲིགས་པའི་ཁོར་ཡུག་གང་ཡང་མེད་དེ་བྱིས་པ་སྐྱེ་བ་དེ་ཚང་མའི་སྐྱེ་མྱོངས་པའི་འདུ་ཤེས་སུ་བཟུང་སྟེ་སྣང་མེད་དུ་འཇོག་ལ། བོད་པའི་མ་ཡུམ་ཞིག་གི་འདུ་ཤེས་ངོས་ན་བུ་ཕྲུག་འཚར་སྐྱེ་བྱེད་པ་ནི་བདེ་ཐང་ངང་འཚར་ལོང་བྱུང་པའི་འགན་ཁུར་གཅིག་པོ་མ་གཏོགས།དེ་འབྱུང་འགྱུར་མི་སྣ་ཅི་འདྲ་བ་ཞིག་ལ་སྐྱེད་བསྲིང་བྱེད་དགོས་པ་དང་བུ་ཕྲུག་གི་ཤེས་ཡོན་སོགས་ལ་དམིགས་གཞིའམ་འཆར་གཞི་གང་ཡང་མེད་པ་མ་ཟད།བདེ་ཐང་ཡང་བདེ་ཐང་ཟེར་བ་ཙམ་ལས་དོན་དངོས་ཀྱི་བདེ་ཐང་ཟེར་བ་ག་འདྲ་ཞིག་ཡིན་པ་གཞི་ནས་ཤེས་མ་མྱོང་།མུན་ནག་འཚོོ་བས་མོའི་ལུས་ངག་ཡིད་གསུམ་འཐོམ་སྦྲིད་དུ་བཏང་འདུག གལ་ཏེ་རོང་བའི་ཁྱིམ་ཚང་ངམ་འབྲོག་པའི་ཁྱིམ་ཚང་གང་ཞིག་གི་མནའ་མར་ཆེད་དུ་བྱིས་པའི་འབྱུང་འགྱུར་གྱི་ཤེས་པ་ལ་དམིགས་ཏེ་ཚན་རིག་དང་མཐུན་པའི་སྦྲུམ་མའི་ཁོར་ཡུག་བསྐྲུན་ན།ཕལ་ཆེར་རི་ཁ་ཁྱིམ་མཚེས་ཀྱིས་འཕྱ་བའི་གནས་ལ་འགྱུར་རྒྱུ་རེད།
རྙིང་ཞེན་གྱི་རྔམ་མཐུག་པ།རིག་གནས་ལ་བརྩི་མཐོང་མེད་པའི་སྤྱི་ཚོགས་ནི་ཁྲིམས་ཁང་ཞིག མཚན་ཆེ་བའི་མ་ཡུམ་ནི་བཙོན་མ་རེད།སྙིང་རྗེ་བའི་དྭ་ཕྲུག་འཁྱམ་པོ་དེ།ད་དུང་སྔར་བཞིན་རང་ཁ་རང་གསོ་ཙམ་ཡང་ཐུབ་རྒྱུ་དཀའ་མོར་སྣང་སྟེ།མི་ཡུལ་ན་་་ལམ་ཁ་ན་་་ར་བཟི་བོར་གྱུར་བ་དེ་སུ་རེད།
མ་བཟང་བུ་མོ་ཡིས།
བོད་པའི་མ་ཡུམ།
དཀོན་མཆོག་གསུམ་པོ་གཙུག་ཏུ་བཀུར་ཞིང་།།
མ་ཎི་ཡིག་དྲུག་ངག་ན་མགུར་བ།།
འགྲོ་དྲུག་སེམས་ཅན་དབུས་ན་གསོལ་བའི།།
གཞུང་དཀར་བོད་པའི་མ་ཡུམ་མཆོག་གོ།
གཞན་རྟེན་བསམ་བློའི་རྨུ་ཐག་རིང་བ།།
རང་ལུས་དམན་པའི་འདུ་ཤེས་རྒྱུ་བ།།
རྐང་ལག་གཉིས་ལ་བསྐྱར་འཇུག་གོམས་པ།།
ལས་སྐྱོ་བོད་པའི་མ་ཡུམ་མོ་རེད།།
ཆོས་པའི་དྲུང་གི་འདྲེ་མོ་འདྲ་བོ།།
ཁྱིམ་ཚང་ནང་གི་གཡོག་མོ་འདྲ་བོ།།
སྡེ་ཁའི་ཁྲོད་ཀྱི་དབྱེན་མོ་འདྲ་བོ།།
བསམ་ཞིང་བསམ་ན་བོད་པའི་མ་ཡུམ།།
ཕ་མའི་ཐུགས་ཀྱི་ལས་ངན་ཅན་མ།།
ཁྱོ་ཀའི་རུམ་གྱི་གཉོམ་ཆུང་ནག་མོ།།
བུ་ཕྲུག་འདང་གི་བྱམས་ལྡན་མ་ལོ།།
རང་སྣང་བོར་བའི་མ་ཡུམ་མོ་འོ།།
ཨ་མའི་དྲུང་གི་ལག་ལས་ཅན་མ།།
ཨ་ནེའི་འདང་གི་གཡོ་རྒྱུ་ཅན་མ།།
དབྱངས་གསལ་སོ་བཞིའི་འོད་མདངས་བོར་བའི།།
མཚན་ཆེའི་དོན་ཆུང་བོད་པའི་མ་ཡུམ།།
མ་བཟང་བུ་མོས།
